وطنه، يا وطنه، يا وطنه
يبو اجروح التذكرنه ابأهلنه
شعبنه, يا شعبنه، يا شعبنه
يبو الفرحه اليتيمه ابگل طربنه
••••••••••••••
لوَن شُح النصر و تحكم الطغيان
نجيك امن الخلايا اسيوف
نجيك امن الضحايا اچفوف
تعلْي ابرايتك و تعدل الميزان
---------•••••--------
جرحنه، يا جرحنه، يا جرحنه
يبو انزوف الغرگ بيها صبحنه
صبرنه، يا صبرنه، يا صبرنه
يبو الآيه الكفر بيها حبرنه
••••••••••••••••••••
لوَن طال الدرب و تحيَّر الوجدان
نجيك ابكل جرح ثار
نجيك ابكل نبض نار
تعلْي ابرايتك و تعدل الميزان
---------•••••---------
تعبنه، يا تعبنه، يا تعبنه
يبو الهِمه النشِد بيها اوتشدنه
سهرنه، يا سهرنه، يا سهرنه
يبو الليل اليطول اشما سهرنه
•••••••••••••••••••••••••
لوَن الشوف عتمَّ و العشگ هان
يرد بينه الضمير اشواگ
يرد بينه الهجر عشاگ
تعلْي ابرايتك و تعدل الميزان
---------•••••••---------
عمرنه، يا عمرنه، يا عمرنه
يبو اسنين الگصر بيها عمرنه
فجرنه، يا فجرنه، يا فجرنه
يبو الشمس التغيب اشما گربنه
••••••••••••••••••••••••••••
لوَن مامش شمس للعين تنبان
شمس الحب تهل بالروح
شمس الحگ تهل بجروح
تعلْي ابرايتك و تعدل الميزان
1980/19/14
الجزائر
شاكر السماوي