آخر الكلام
شاكر السماوي
شاكر السماوي
🌹
ما هذا اوداع، اولا ملگئ
بس شيْ بيَّ رايدني احچي.
شيْ ما گلته ابعمري الفات.
شيْ ما چنت اعرف احچيه
لا بالشعر، اولا بالنثر،
اولا بالصمت، اولا بالهمس.
لا چنت اگدر افرز منه وَهْمه اوعِلْمه.
أوأتيقن بالمضبوط
عن شيْ من چذبه اومن صدگه.
بس راح احچي اوعالمكشوف!
اولو ما بيكم تتحملون إلصدگ المُر،
أحچيها ابنص ع المكشوف
واللي ايريد ايصدَّگ يسمع مني،
و يتأمل، و يحاول مثلي ايشوف
واللي ما بيه يسمع و يصدَّگ و يشوف،
يگدر يتطورش و يعوف.
••
كل احنه ابعالمنه الجاي
نطفة غيب ابغيب الجاي.
بيها اسرار من دنيانه هاي العافتنه اوعفناها
اوبيها اسرار من دنيانه تتلگانه
وتسوّينه منها اوبيها لو عشناها
اوحسبوني اهذي لو گلت الكم
عن هالكون من ايدير اومن يندار:
-بهاي الدنيه،
اوبالدنيه اللي تتنطرنه
الاسرار التضوي اهنانه
اتدوّٓر عن اسرار اهناك
هلبت تلگيها اوتضويها،
اوهلبت هَمْ تتضوَّئ بيها.
و الاسرار تتلاقح بيها الأسرار
مثل النار التتوهجَّ بآسباب النار.
اومآنه الأهذي...
/اوصدگوني ابهاي./
لو گلت الكم:
- دنيانه ادروب الما تخلص
گبل الموت اوبعد الموت.
وحنه اعليها اوبيها انفوت ...
روجه اتنط
وتسوح ابحدها
وترد اتغط
وتغوص ابلا حد
اوتتلاشئ او...
اوما تعرف بدروب الماي
اشچان امخبي الها الماي.
••
اومن هسه اهجس يتراوالي
ابدنياي اللي بعد الموت...
/أعني ابكلمة موت اهنا،
هذا الما نعرف. له احدود ابها الدنيه
اوحددناه ابكلمة موت./
...، راح الگئ ابكل الأشياء بعض اشياء
چانت بيَّ، اووياي، اتحومي ابدنياي...
مثل اطياف
اومثل اوهام
اومثل اشباح
لا يعرفها المعنئ ابمعنئ
اولا شوف اليضويها ابشوف
او لا تصدح من تحچي اوياي ابنبرة صوت
لاچن بيَّ شيْ من عِدها
او شيْ من حَدها.
اوبيها اشياء من عندي ألگاها اتانيني
مثل الومض الظل بالخاطر، من امتد اومن انزاح
تآخذ مني اللي ايسوّيها بيها ارواح
اوتنطيني منها آلياخذني اليمها ارواح.
و اتحيرَّت ابحالي اهناك:
هاي الدنيه الما أعرفها اولا تعرفني،
صارت مني اوبي، اوراحت
بالحب تهديني اوتحديني
واهجست ارجع بيَّ اجديد،
بس مو شاكر ذاك الچنته!
فد شاكر ما اعرف شنهو،
خذني اوطوَّح بي ابعيد،
اووردني بي شاكر لا عُرفه، او لا شفته!
كل هاي اتخيلها اهنا،
وآنه اوياكُم، اتنفسكُم،
وآضحك مني، وآضحك منكم
هلبت بالضحكات الگاني، لو ألگاكم!
لاچن للحگ :
ما أهجس شي ظل مني بيكُم
او لا منكُم ظل شيْ يبقيكم بيَّ، اوبالغيب ايتانيكم.
خليكم بيكم، خليكم
حاضركم ياكل ماضيكم، و البومه الباچر تحديكم.
آه!... اوآه!!...
اشگد اتمنئ ألگئ بيكم من يسمعني.
والگي اللي يسمعني يگدر يفهم اللغازي اويفهمني:
من يطويني الموت ابوعده،
اويطوي اوياي كل هسه اوكل باچر بعده،
اهجس بعد الباچر بي يمتد عُگبه
اوعَگبه
اوعَگبه...
تمتد بعد الدهر اوحدَّه.
و الگاع اللي تتلگاني
تمتد گيعان اوگيعان،
تتمطئ احدود اوتآخذني...
جثه اتذب الموت البيها
وترد تتنفس ماضيها،
البيها ايصير باچر تمتد بيه اكوان.
البيها اتشوف الماي اسراب
وتشوف الظلمه امرايات،
زيبگها ايلالئ اعلئ العين
رايات اتودع رايات
تنفض عنها ماضيها اوحاضرها الفات.
و الكل يتحول بالكل
ابلا أسباب او لا غايات.
اوما تعرف بالعالم ذاك:
ياهوْ العاش؟
اوياهوْ المات؟
اوبين الضَيْ الأسود ذاك
والظلمه التسطع بهناك،
گمت اهجس فد شيْ و اشياء...
تتبعني
اوتسبگني
اوتتخلَّف
مثل الماي ابماي اتغلَّف
واهجس حتئ امن اسنيني الچانت تمشي اوياكم
اسنين اتظل اوياي اهناك مثل اخيالي،
تمتد بالظلمه اوترسمني
اسراب اسود بعيوني اترفرف.
و الأغرب من كل ما يجري
ما حسيت ابغُربه اهناك
اوچن روحي چانت تتوحم
اتعيشني بالعالم ذاك!
اوكل شي الگيته امغير كل شيْ،
الغربه ابلا غربه اهناك
والحب ما يحتاج احباب
والرب خله الكل ارباب
اومامش زين اومامش شين
او لا من جاي او لا من راح
او لا موت ايجيس الأرواح
ماِمش لا غبشه او لا مغرب
او لا گبل، او لا بعد، او لا هسَّه
او حتى الأرواح اللي اهناك
لا هيْ ابجنه ، و لا هيْ ابنار
او لا هيْ التتنطر قِسطاس، او لا رب ايوزع أدوار.
••
آخ الرب!
اخ الروح !
اوآخ ابنادم بين الجارح و المجروح!
اوآخ الراح!
اوآخ الجاي
اوآخ الشوگ اللي ما يتعب
تعبتوني اهوايه أهوايه
اوحيرتوني ابكل احچاية
اوصرت امضيع، ما أدرني:
آنه اوياكم؟
منكم؟
إلكم؟
او لا أدرني
إنتم مني؟
ضدي؟
اوياي؟
خليتوني امشتت بيَّ،
لا إيماني بيكُم شَدني إلكُم
شدة گطرة ماي الماي
اشما شردت تلگاها اوياه
اولا تشكيكي بيكم هدني منكم
هذة نجمه الضيْها الضاع
بالكون او ضاعت وياه.
••
كل هذا اللي احچيته اوياكم
اوشفتوه مني، اوجاكم عني،
چذب ابيض من ذاك البيكم
غصت اوياه...
اوجبته اوياي،
من ذيچه التفاحة الفضحت كل ما بيكم
اوسَّوت ماضيكم مستقبل
اوخلَّت مستقبلكم يبقئ بس ماضيكم
اوگلت ابها الشعر ارجع بيكم
صدگ اسود محروگه احروفه
هلبت صاري الحلم الجاي
يحدينه، او تندهنه اجروفه !
آخ الشوف اشگد تعبني!
وشگد حبري الغصبن عني
يكتبني احروف اتودعكم
وتودعني...
ناقوس اخرس،
لا ايصحَّيني، او لا ايصحّيكم!
جيت انصحكم - وهوايه انصحكم
لا تخدكم صوره او فكره
من شاعر احلامه اتسكره!
خلوه امعلگ باوهامه
اوتفاحتكم خلوها الكم،
متروسه ابتفاح ايامه!!
آخر عذر ابآخر حبر
يحچيني اويفضحكم سره:
-يمكنكم بالهذا الگلته
ما اتصدگوني اوما اتصدگونه!
بس اعرفكم - زين اعرفكم -
تحبون الچذبه الملفوفه ابچذبه اتجيكم
برّاقه اوبالحب متنكرة!
وآنه اعذركم لو تنسوني
اوتنسون اشعاري اوافكاري
اوتنسون اشگد جرحتوني،
واشگد سممتوها العِشره.
من حيث انتم عودتوني:
تمحون اسطوره اليفضحكم بالعيب اللي عشعش بيكم.
اوتعمون اعيونه اليشوف ظلمتكم تطفيكم بيكم.
وتدفنونه المره ايگلكم: باچركم يدفنكم بيكم
بس شيْ بيَّ رايدني احچي.
شيْ ما گلته ابعمري الفات.
شيْ ما چنت اعرف احچيه
لا بالشعر، اولا بالنثر،
اولا بالصمت، اولا بالهمس.
لا چنت اگدر افرز منه وَهْمه اوعِلْمه.
أوأتيقن بالمضبوط
عن شيْ من چذبه اومن صدگه.
بس راح احچي اوعالمكشوف!
اولو ما بيكم تتحملون إلصدگ المُر،
أحچيها ابنص ع المكشوف
واللي ايريد ايصدَّگ يسمع مني،
و يتأمل، و يحاول مثلي ايشوف
واللي ما بيه يسمع و يصدَّگ و يشوف،
يگدر يتطورش و يعوف.
••
كل احنه ابعالمنه الجاي
نطفة غيب ابغيب الجاي.
بيها اسرار من دنيانه هاي العافتنه اوعفناها
اوبيها اسرار من دنيانه تتلگانه
وتسوّينه منها اوبيها لو عشناها
اوحسبوني اهذي لو گلت الكم
عن هالكون من ايدير اومن يندار:
-بهاي الدنيه،
اوبالدنيه اللي تتنطرنه
الاسرار التضوي اهنانه
اتدوّٓر عن اسرار اهناك
هلبت تلگيها اوتضويها،
اوهلبت هَمْ تتضوَّئ بيها.
و الاسرار تتلاقح بيها الأسرار
مثل النار التتوهجَّ بآسباب النار.
اومآنه الأهذي...
/اوصدگوني ابهاي./
لو گلت الكم:
- دنيانه ادروب الما تخلص
گبل الموت اوبعد الموت.
وحنه اعليها اوبيها انفوت ...
روجه اتنط
وتسوح ابحدها
وترد اتغط
وتغوص ابلا حد
اوتتلاشئ او...
اوما تعرف بدروب الماي
اشچان امخبي الها الماي.
••
اومن هسه اهجس يتراوالي
ابدنياي اللي بعد الموت...
/أعني ابكلمة موت اهنا،
هذا الما نعرف. له احدود ابها الدنيه
اوحددناه ابكلمة موت./
...، راح الگئ ابكل الأشياء بعض اشياء
چانت بيَّ، اووياي، اتحومي ابدنياي...
مثل اطياف
اومثل اوهام
اومثل اشباح
لا يعرفها المعنئ ابمعنئ
اولا شوف اليضويها ابشوف
او لا تصدح من تحچي اوياي ابنبرة صوت
لاچن بيَّ شيْ من عِدها
او شيْ من حَدها.
اوبيها اشياء من عندي ألگاها اتانيني
مثل الومض الظل بالخاطر، من امتد اومن انزاح
تآخذ مني اللي ايسوّيها بيها ارواح
اوتنطيني منها آلياخذني اليمها ارواح.
و اتحيرَّت ابحالي اهناك:
هاي الدنيه الما أعرفها اولا تعرفني،
صارت مني اوبي، اوراحت
بالحب تهديني اوتحديني
واهجست ارجع بيَّ اجديد،
بس مو شاكر ذاك الچنته!
فد شاكر ما اعرف شنهو،
خذني اوطوَّح بي ابعيد،
اووردني بي شاكر لا عُرفه، او لا شفته!
كل هاي اتخيلها اهنا،
وآنه اوياكُم، اتنفسكُم،
وآضحك مني، وآضحك منكم
هلبت بالضحكات الگاني، لو ألگاكم!
لاچن للحگ :
ما أهجس شي ظل مني بيكُم
او لا منكُم ظل شيْ يبقيكم بيَّ، اوبالغيب ايتانيكم.
خليكم بيكم، خليكم
حاضركم ياكل ماضيكم، و البومه الباچر تحديكم.
آه!... اوآه!!...
اشگد اتمنئ ألگئ بيكم من يسمعني.
والگي اللي يسمعني يگدر يفهم اللغازي اويفهمني:
من يطويني الموت ابوعده،
اويطوي اوياي كل هسه اوكل باچر بعده،
اهجس بعد الباچر بي يمتد عُگبه
اوعَگبه
اوعَگبه...
تمتد بعد الدهر اوحدَّه.
و الگاع اللي تتلگاني
تمتد گيعان اوگيعان،
تتمطئ احدود اوتآخذني...
جثه اتذب الموت البيها
وترد تتنفس ماضيها،
البيها ايصير باچر تمتد بيه اكوان.
البيها اتشوف الماي اسراب
وتشوف الظلمه امرايات،
زيبگها ايلالئ اعلئ العين
رايات اتودع رايات
تنفض عنها ماضيها اوحاضرها الفات.
و الكل يتحول بالكل
ابلا أسباب او لا غايات.
اوما تعرف بالعالم ذاك:
ياهوْ العاش؟
اوياهوْ المات؟
اوبين الضَيْ الأسود ذاك
والظلمه التسطع بهناك،
گمت اهجس فد شيْ و اشياء...
تتبعني
اوتسبگني
اوتتخلَّف
مثل الماي ابماي اتغلَّف
واهجس حتئ امن اسنيني الچانت تمشي اوياكم
اسنين اتظل اوياي اهناك مثل اخيالي،
تمتد بالظلمه اوترسمني
اسراب اسود بعيوني اترفرف.
و الأغرب من كل ما يجري
ما حسيت ابغُربه اهناك
اوچن روحي چانت تتوحم
اتعيشني بالعالم ذاك!
اوكل شي الگيته امغير كل شيْ،
الغربه ابلا غربه اهناك
والحب ما يحتاج احباب
والرب خله الكل ارباب
اومامش زين اومامش شين
او لا من جاي او لا من راح
او لا موت ايجيس الأرواح
ماِمش لا غبشه او لا مغرب
او لا گبل، او لا بعد، او لا هسَّه
او حتى الأرواح اللي اهناك
لا هيْ ابجنه ، و لا هيْ ابنار
او لا هيْ التتنطر قِسطاس، او لا رب ايوزع أدوار.
••
آخ الرب!
اخ الروح !
اوآخ ابنادم بين الجارح و المجروح!
اوآخ الراح!
اوآخ الجاي
اوآخ الشوگ اللي ما يتعب
تعبتوني اهوايه أهوايه
اوحيرتوني ابكل احچاية
اوصرت امضيع، ما أدرني:
آنه اوياكم؟
منكم؟
إلكم؟
او لا أدرني
إنتم مني؟
ضدي؟
اوياي؟
خليتوني امشتت بيَّ،
لا إيماني بيكُم شَدني إلكُم
شدة گطرة ماي الماي
اشما شردت تلگاها اوياه
اولا تشكيكي بيكم هدني منكم
هذة نجمه الضيْها الضاع
بالكون او ضاعت وياه.
••
كل هذا اللي احچيته اوياكم
اوشفتوه مني، اوجاكم عني،
چذب ابيض من ذاك البيكم
غصت اوياه...
اوجبته اوياي،
من ذيچه التفاحة الفضحت كل ما بيكم
اوسَّوت ماضيكم مستقبل
اوخلَّت مستقبلكم يبقئ بس ماضيكم
اوگلت ابها الشعر ارجع بيكم
صدگ اسود محروگه احروفه
هلبت صاري الحلم الجاي
يحدينه، او تندهنه اجروفه !
آخ الشوف اشگد تعبني!
وشگد حبري الغصبن عني
يكتبني احروف اتودعكم
وتودعني...
ناقوس اخرس،
لا ايصحَّيني، او لا ايصحّيكم!
جيت انصحكم - وهوايه انصحكم
لا تخدكم صوره او فكره
من شاعر احلامه اتسكره!
خلوه امعلگ باوهامه
اوتفاحتكم خلوها الكم،
متروسه ابتفاح ايامه!!
آخر عذر ابآخر حبر
يحچيني اويفضحكم سره:
-يمكنكم بالهذا الگلته
ما اتصدگوني اوما اتصدگونه!
بس اعرفكم - زين اعرفكم -
تحبون الچذبه الملفوفه ابچذبه اتجيكم
برّاقه اوبالحب متنكرة!
وآنه اعذركم لو تنسوني
اوتنسون اشعاري اوافكاري
اوتنسون اشگد جرحتوني،
واشگد سممتوها العِشره.
من حيث انتم عودتوني:
تمحون اسطوره اليفضحكم بالعيب اللي عشعش بيكم.
اوتعمون اعيونه اليشوف ظلمتكم تطفيكم بيكم.
وتدفنونه المره ايگلكم: باچركم يدفنكم بيكم
2003-05-19
ش.س
ش.س
ليست هناك تعليقات:
إرسال تعليق