رساله إلى مجنون
شعر: شاكر السماوي

🌹رساله إلى مجنون

🌹

لا تنهِضم... لو شِفِت مگلوبي الحِلِم.
لا تنهِضم... لو بيَّن ابعينك وشِم.
لا تنهِضم...
لو دگ بساميره العِلِم بعظامك اوخض الجِسم
لو دمك يرجَّه اويِلم بعيونك ارماد النجِم...
لا تنهِضم.
لا تنهِضم
لو گالوا النار انشِنَط بيها الضوه...
يارِيَّه شگگها الهوئ
لا تنهِضم
ِكلها علئ دربك ِمشت مجنونه، مجنونه الدوئ!!
گالوا لك امسودٌَن صِرِت؟!...
وتباشروا، وتضاحكوا، بشفاف تارسها الغوئ!
اولاچَن سوادين العقِل كل ساعه تخِنگ فَد حِلِم؟!
اولاچَن طُفح چيل السُّگم، تتشايم ابزوده الزّٓلم!
وإنتَ اشبِدئ منك بعد...
حَتْ گالوا اظنونك تِسِم؟!...
لا تنهِضم.
.................
اولو گالوا امسودَن عليك،
اوگالو ابطرف الهمِس:
- مسكين! ياويله تعِس!!
- موش إنتَ مسكين اوتعِس!
مسكين، اوتعِس من تعِس....
كِل مَن هِلَك حَيله اورِجئ: تنبع امن أترابه شمس!
كِل مَن هِلَك حَيله اورِجئ: يشبخ علئ باچر أمس!!
اولا تنهِِضم ...لو شِفت ضيَّه جرَّحك،
وبلَصْفة اعيونك ضَحك...
لا تنهِضم.
....................
يَلْ علِگك دمك علئ ادروب الوكت نـِكته اوخُبَر./ يل ماثِبَت فوگك أثر./
يَلْ نشَّفِت وجه الگُمر.. بس إنتَ حُر ابها البشر...
لا شالت اچفوفك صخَر،
اولا كِلبچك باچر ولا شالت سواليفك ِعبَر......
مرتاح وجدانك نِمت...
لا وَهوَسِت، لاچذَّبِت،
لا شِلِت نيه امجرَّحه،
لا ضِگِت طَبرات العِدو، لا ضِگِت خوف المِستحئ،
لا رضعت اهروشك صبر
اولا عَّلگِت "سَبع اعيون"!•
خَيْ عونك ابطيف العُمُر تگضي حياتك مجنون!
.............................
...........................
لا تندم اوعقلك يشُط،
وآبليس بعيونك يُنُط
ِمن گال: جَنَّات القفص: للطير أحسَن يحُط؟!

بغداد
1967-11-05
ش.س